ზაზა ფაჩულია

ასაკი: 34 წლის (10.02.1984)
პოზიცია: ცენტრი #27
სიმაღლე: 211სმ
წონა:125კგ
1072
მატჩი
7384
ქულა
6264
მოხსნა
1365
პასი
112
ორმაგი დუბლი
"კევინ გარნეტმა იდაყვი ჩამარტყა და იმ მომენტში გავცხარდი. მისკენ რომ გავიწიე, დარბაზში შეკრებილი 20 ათასი გულშემატკივარი ჩხუბისკენ მომიწოდებდა. ერთადერთი, ვინც "არას" ყვიროდა, ჩემი მეუღლე იყო.
საბოლოოდ, ხელჩართულ ჩხუბამდე საქმე არ მისულა. მთავარი კი ისაა, რომ ის მატჩი მოვიგეთ. გარნეტთან დაპირისპირებამ დიდი გამოხმაურება იმიტომაც ჰპოვა, რომ ინციდენტი პლეი ოფში, თანაც მოედნის ცენტრში მოხდა და ყველა კამერა ჩვენკენ იყო მომართული. NBA-ს მატჩებს კი მილიონობით ადამიანი უყურებს" ეს იყო ეპიზოდი, რომელმაც ზაზა ფაჩულია მსოფლიოს ერთი-ორად უკეთესად გაიცნო.
კარიერა
1998-2003 ულქერი 1998 წელს ზაზა ფაჩულია "მართვედან" თურქულ "ულქერსპორში" გადავიდა. თურქეთში შეიტყო მამის, დავით ფაჩულიას დაღუპვის ამბავი, ოჯახთან, საქართველოში დაბრუნება გადაწყვიტა, მაგრამ დედამ, მარინა ფაჩულიამ გადააფიქრებინა და სტამბოლელებთან ერთად თინეიჯერი ზაზა 2001 წელს თურქეთის ჩემპიონი გახდა, ხოლო 2003 წელს თასი მოიგო. 2003 წლის 9 აპრილს "პანათინაიკოსთან" 92:73 მოგებულ მატჩში ზაზამ 26 ქულა ჩააგდო და ევროლიგის ტურის საუკეთესო კალათბურთელად დასახელდა
2003-04 ორლანდო მეჯიქი NBA-ს დრაფტზე ზაზა ფაჩულია "ორლანდო მეჯიქმა" 42-ე ნომრად აიყვანა. ახალგაზრდა ქართველი 59 მატჩში საშუალოდ 11.3 წუთში 3.3 ქულასა და 2.9 მოხსნას აგროვებდა. ამერიკაში პირველად 2004 წლის 19 იანვარს "მილუოკი ბაქსთან" მატჩში ასცდა 10-ქულიან ნიშნულს, (11 ქულა, 5 მოხსნა) და "ორლანდოს" იშვიათი გამარჯვების თანაშემოქმედი გახდა.
2004-05 მილოუკი ბაქსი ფაჩულია "მეჯიქიდან" "მილუოკიმ" გადაიყვანა. სასტარტო ცენტრ დენ გაძურიჩთან კონკურენციაში ზაზამ "ბაქსში" 74 მატჩი ჩაატარა, 18.9 წუთში 6.2 ქულასა და 5.1 მოხსნას აგროვებდა. პირველი NBA-ური ორმაგი დუბლი 23 თებერვალს "ნიუ ჯერსისთან" შეასრულა - 14 ქულა, 12 მოხსნა. 2005 წელს NBA-ს დაუბრუნდა "შარლოტი", რომლისთვისაც სპეციალური დრაფტი გაიმართა და "მილუოკიმ" ქართველი ცენტრი დრაფტზე დააყენა.
2005-2013 ატლანტა ჰოქსი "შარლოტმა" ზაზა დრაფტზე არ აიყვანა, სამაგიეროდ თავისუფალ აგენტთა ბაზარზე ქართველი "მშენებარე" "ატლანტამ" შენიშნა, ოთხწლიანი კონტრაქტი გაუფორმა. პირველ სეზონში ფაჩულიას მონაგარი შთამბეჭდავი იყო: 78 მატჩი, 31.4 წუთი, 11.7 ქულა, 7.9 მოხსნა. მომდევნო სეზონში მან ქულათა საშუალო მონაგარი გააუმჯობესა: 72 შეხვედრა, 12.2 ქულა, 6.9 მოხსნა. 2007-ში დამყარებული პირადი რეკორდი ჯერაც "ცოცხალია" - 7 მარტს "ვაშინგტონთან" ფაჩულიამ 27 ქულა მიითვალა.
2013-2015 მილოუკი ბაქსი2013 წლის ზაფხულში ზაზას "სან ანტონიოც" ეპატიჟებოდა, მაგრამ ნაცნობ მწვრთნელ ლარი დრიუსთან "მილუოკიში" წავიდა. სწორადაც მოიქცა - გუნდის ლიდერად იქცა. სწორედ ვისკონსინის შტატის გუნდში დააფიქსირა ისტორიული რეკორდი 2015 წელს: ზაზას "ბრუკლინ ნეთსთან" მატჩში 18 შეტევითი მოხსნა მიითვალა, რაც NBA-ს ისტორიაში მესამე მაჩვენებელია, 21-ე საუკუნეში კი - პირველი. აბსოლუტური რეკორდი მოუზეს მელოუნს ეკუთვნის - 1982 წელს მეტოქის ფარზე 21-ჯერ მოხსნა, მანვე, 1979 წელს 19-ჯერ მოხსნა, რაც მეორე შედეგია.
2015-2016 დალას მევერიქსი- ივლისის ერთ დილას მილუოკიში, ინდივიდუალური ვარჯიში დავასრულე, დარბაზიდან გამოვედი, - დინჯად იხსენებს ფაჩულია, - ტელეფონზე ზარი გაისმა, აგენტმა დამირეკა: ბარგი ჩაალაგე, დალასში მიდიხარო. - რა საქმეზე-მეთქი? - ვკითხე. - სათამაშოდო. - კონტრაქტი? მილუოკი? - გუნდებმა გაცვლა განახორციელეს. მომავალ სეზონს ტეხასში გაატარებო, - მითხრა აგენტმა. ეს ჩემთის დიდი მოულოდნელობა იყო. ...და როგორც თავად ამბობს NBA-ში საუკეთესო სეზონი გამოუვიდა: 26.4 წუთი, 8.6 ქულა, 9.6 მოხსნა, 1.7 პასი. რაც მთავარია, "დალასი" პლეი ოფში გაიყვანა
2015-2016 გოლდენ სტეიტი- 4 ივლისი იყო, როცა გავიგე, რომ კევინ დურანტი "უორიორსში" გადავიდა. საინტერესო ტრანსფერია, ახლა ვინღა შეაჩერებს "გოლდენ სტეიტს"? - გავივლე გონებაში. არადა, ამ გუნდიდან შეთავაზება მეც მიღებული მქონდა. დურანტის დამატებიდან 24 საათში ჩემი გადასვლაც გადაწყდა... ვიდრე ხელშეკრულებაზე თავის ავტოგრაფს დასვამდა, ზაზა მთავარ მწვრთნელ სტივ კერს ელაპარაკა: - მან მითხრა - ცენტრის პოზიციაზე "გოლდენ სტეიტის" ნომერ პირველ ვარიანტად განგიხილავო. ეს ჩემთვის ამაღელვებელი მომენტი იყო. ყოველთვის სასიამოვნოა, როცა გაფასებენ და უნდიხარ, მით უფრო, როცა ლაპარაკი "ოურიორსის" დარ გუნდზეა.
#NBAVOTE
AllStar
შესაძლოა, ბევრს არ ახსოვს, მაგრამ ზაზამ მოთელვა 2007 წელს გაიარა, პირველად სწორედ მაშინ გაუჩნდა ვარსკვლავთა მატჩში მოხვედრის შანსი. ატლანტელი ფაჩულია აღმოსავლეთის კონფერენციის ცენტრებში მეექვსე ადგილზე გავიდა, ჩამორჩა შაკილ ონილს, დუაით ჰოვარდს, ბენ უოლასს, ალონზო მურნინგსა და ენდრიუ ბოგატს. იცით რამდენი ხმა მიიღო ქართველმა?

- 244 507! 2016 წელს ქართველი გულშემატკივრების საოცარი მონდომების წყალობით ზაზამ 768 112 ხმა მოაგროვა და სულ ცოტა დააკლდა ხუთეულში გასასვლელად. კავაი ლეონარდმა მას 14 228 ხმით აჯობა და მან ითამაშა ვარსკვლავთა მატჩი. ფაჩულიამ ნოვიცკისა და დანკანს გადაასწრო.2017 წელს, "გოლდენ სტეიტის" ქართველმა ცენტრმა საკალათბურთო საზოგადოება კიდევ უფრო გააოცა - "ოლ სტარის" გამოკითხვაში გულშემატკივართა 1 528 941 ხმით დასავლეთის ფორვარდთა შორის მე-2 ადგილზე გავიდა (დურანტის შემდეგ). ...მაგრამ ვარსკვლავთა მატჩში მაინც ვერ მოხვდა.
მიზეზი "ზაზას წესია"!
- მჯერა იმის, რასაც ვამბობ: ჩვენ, ქართველებმა "ოლ სტარის" წესები შევცვალეთ. შარშან მართლაც ცოტა დამაკლდა. ეს უკვე გამარჯვება იყო, რადგან სწორედ ამ შემთხვევის გამო, მიმდინარე სეზონის წინ კომისარი ადამ სილვერი და NBA-ს ხელმძღვანელობა შეიკრიბა და წესებში ცვლილებები შეიტანა. თუ აქამდე მხოლოდ ფანებზე იყო დამოკიდებული, ამჯერად ხმების მეორე ნახევარი კალათბურთელებს, მედიასა და მწვრთნელებს ეკუთვნით.
1528 941
ხმა 2017
საქართველოს ნაკრები
დებიუტი
ზაზას სანაკრებო დებიუტი 2000 წელს ლუქსემბურგთან მატჩში ჰქონდა, იმავე ციკლში კი ქართველ გულშემატკივარს მომავლის იმედი გაუჩინა: ბელარუსთან 83:78 მოგების შემდეგ ფაჩულია ქომაგმა ხელში აიტაცა და მოედნიდან ისე გაიყვანა: "არ შეიძლება ადამიანს ამ მომენტის შემდეგ სპორტის სასახლეში თამაში სიამოვნებას არ განიჭებდეს. ჩემ მიწა-წყალზე, სადაც დავიბადე, გავიზარდე, თამაში ყოველთვის განსაკუთრებული და განსხვავებულია. ამ გრძნობას არანაირი მატერიალური მხარე არ გააჩნია - ესაა გული, სული, ქართველობა. დიდი სიამაყის გრძნობაა, როცა შენი ქვეყნის მაისურით გადიხარ მოედანზე მისი სახელის დასაცავად."
ელიტაში
2004-დან 2009 წლის ჩათვლით საქართველოს ნაკრები მეორე დივიზიონში თამაშობდა. ფაჩულია ყოველ წელს ულაპარაკოდ ჩამოდიოდა და გუნდის ელიტაში შეყვანას ცდილობდა. ეს 2009 წელს გამოუვიდა - ჩვენმა გუნდმა საკვალიფიკაციო ჯგუფში პირველი ადგილი დაიკავა, ხოლო პლეი ოფში ბელარუსს აჯობა. ამის შემდეგ ზედიზედ ოთხჯერ საქართველოს ნაკრებმა ევრობასკეტზე ითამაშა
რეკორდი
ფაჩულიამ 2006 წლის 13 სექტემბერს ფინეთის ცივ დედაქალაქში საქართველოს ნაკრების რეკორდი დაამყარა - 36 ქულა ჩააგდო. - 36 ქულა გამახარებდა მხოლოდ იმ შემთხვევაში, თუ გავიმარჯვებდით. მთავარია არა ინდივიდუალური სტატისტიკა, არამედ ნაკრების წარმატება, - თქვა ზაზამ, რომლის გუნდიც 81:91 დამარცხდა.
ევრობასკეტი 2011
საქართველოს ნაკრებმა ჯგუფში მესამე ადგილი დაიკავა და მეორე წრეში გავიდა. პირველი ეტაპის ბოლო მატჩში, ბულგარეთთან ფაჩულიას ფეხის კუნთი გაუწყდა და ბოლო მეორე წრეში გუნდს ვეღარ დაეხმარა.
ევრობასკეტი 2013
შესარჩევი ეტაპი ზაზამ შედეგიანად გამართა, თუმცა 2013 წლის აპრილში აქილევსის მყესის ოპერაცია დასჭირდა და ევრობასკეტი 2013-მდე რეაბილიტაცია ვერ მოასწრო
ევრობასკეტი 2015
საწყის სამ მატჩში ჰოლანდიასთან, სლოვენიასთან და საბერძნეთთან დავმარცხდით. მეოთხის (მაკედონიასთან) მოგების შემთხვევაში პლეი ოფში გასვლის კარგი შანსი გვიჩნდებოდა: მოვიგეთ კიდეც - ზაზამ 23 ქულა და 14 მოხსნა მოაგროვა... 1/8 ფინალში იყო ლიტვა, რომელთანაც ბოლო წამებზე დავმარცხდით. ზაზა - 23 ქულა, 7 მოხსნა.
ევრობასკეტი 2017
მოსამზადებელ ეტაპზე ზაზას კოჭი გადაუბრუნდა, თუმცა თელავივში ბოლომდე იბრძოლა... ლიტვის ძლევის (79:77) შემდეგ მხოლოდ ისრაელს ვაჯობეთ, რაც პლეი ოფში გ ასასვლელად საკმარისი არ აღმოჩნდა. ზაზა ფაჩულია: "ჩვენი ადგილი ევროპაში უკვე დავიმკვიდრეთ, ჩვენი ხასიათი ყველას დავანახეთ. უცხოელები აღარ გვიყურებენ როგორც აუტსაიდერებს, დავამტკიცეთ, რომ ყველასთან თამაში შეგვიძლია. რაც მთავარია, ღირსეული თამაში!"
75
მატჩი
2047
წუთი
1236
ქულა
619
მოხსნა
საქართველოს ნაკრები
2000-2017
დედამ,მარინა კოდუამ პატარა ზაზა კალათბურთზე დიდუბის მანეჟში მიიყვანა...
"დარბაზში უცხოდ მივედით, მაშინ მწვრთნელ, ზურა სამხარაძეს არ ვიცნობდი. მწვრთნელმა მშობლებს გვანიშნა - ვარჯიში იწყება, დარბაზი დატოვეთო. ...პირველივე დღე იმდენად მოეწონა, რომ მას მერე ზაზას სპორტის სხვა სახეობაზე არც უფიქრია. ასე დავრჩით კალათბურთზე."
ზაზა ფაჩულია: "პატარაობაში, ისევე როგორც ყველა ბავშვს, მეც მქონდა ოცნება. NBA-ს კალათბურთელებს რომ ვუყურებდი, მინდოდა, მათთან მეთამაშა, მათსავით ძლიერი ვყოფილიყავი. ამისთვის ძალა არ დამიშურებია, ბევრი რამ გადავდე გვერდზე და ვვარჯიშობდი. ბევრს ვვარჯიშობდი...
ფაჩულიას აკადემია "საქართველოში რომ ჩავდივარ, შინ ჩანთებს დავალაგებ და ჩემს აკადემიაში გავრბივარ. ძალიან მახარებს თითოეული ბავშვის წარმატება, მინდა მათ შესაძლებლობების მაქსიმალურად გამოვლენაში ხელი შევუწყო. სადღეისოდ ჩვენთან უკვე 600-მდე მოზარდი ვარჯიშობს".
ოჯახი "ოჯახი ჩემთვის ძალიან ბევრს ნიშნავს. მეუღლე მხარში მიდგას, კარგად ესმის, როცა საქართველოს სჭირდება, შესაძლოა ქმარი დიდი ხნის განმავლობაში ვერ ნახოს," - ამბობს ზაზა ფაჩულია, რომელსაც მეოთხე შვილი ნუცა 2017 წლის სექტემბერში ევრობასკეტის მსვლელობისას შეეძინა.
ზაზა ჩემპიონია!
პროექტზე მუშაობდნენ:
იდეის ავტორი:ლევან ტაბატაძე, ჟურნალისტი: ვაჟა სიმონიშვილი
ტექნიკური ჯგუფი: გიორგი ბაწაშვილი, ანი ელჩიშვილი, ლევან ტაბატაძე